مواقف وطرائف من جواز الصالونات

ياجماعة انا اتبهدلت كتير، واتعرضت لنماذج غريبة من الناس ... ممكن المواقف دى تبان مضحكة بس هى أكلت من دمى وأعصابى، واللى غايظنى انى مابقدرش أفهم الشخص اللى قدامى اد ايه هو انسان مستفز ومنرفزنى ... كان رد فعلى فى كل المواقف اللى تحت هى الابتسام ومحاولة شرح موقفى، واليكم بعض من المواقف اللى اتعرضتلها

واحد سألنى على نوع العربية بتاعتى ومرتبى أد ايه ... وزى الهبلة قلت له انها عربية128 وبقبض 2000 جنية واخدت بالى ان السؤال غريب بعد ما خلصت المقابلة

واحد كان مصمم انى غيرانة منه!!!! ليه ... لانه بيكتب مدونة ومتغاظة منه ان مدونتة الناس بتعلق فيها كتير، طبعا حرق دمى وحاولت أفهمه بالراحة ان الموضوع ده مش فارق معايا اساسا ... بس ولا فيه فايدة

واحد سألنى: انى بتورى الرسائل اللى ببعتهالك لمامتك؟ كان نفسى أقول له وانت مالك ... الظريف فى الموضوع ان هو بيورى كل حاجة لمامته، لدرجة انى فى أول ما اتعرفت عليه رنى على الموبايل ولما ماردتش عليه لان ماكانش معايا رصيد مامته  كلمت ماما وقالت لها "ياريت يا مدام تخلى ماريان ترد" وبعد أول أسبوع عرفت انه بيقول الصغيرة قبل الكبيرة لمامته، وفى الاخر بيسألنى اذا كنت بورى الرسائل لماما

واحد - وهو ظابط شرطة - لما قابلته كان لابس تى شيرت هاينفجر من على جسمه، يعنى أنا مش عايزاه يجى لابس رسمى بس ليه شغل الشحات مبروك ده

واحد - بعد 3 أسابيع من التعارف، حاولت أقرب منه شوية ولما جالى تليفون بخصوص شغل جديد كلمته علشان أشاركه معايا ... تصوروا يفهم ايه؟ يفهم ان ماما هى اللى قالتلى أكلمه ... شىء مفتقد للرومانسية والبساطة ... طبعا الشخص ده هو هو رقم اتنين. رد فعلى؟!!!! لا أبدا كتمت الغيظ وقعدت بهدوء أحاول أفهمه مبدأ المشاركة

واحد جه متأخر عن معاده معانا بساعة وربع ولما جه ولا اعتذر ولا كأن فيه حاجة حصلت

واحد أخدنى - وانا زى العبيطة وافقت - وودانى علشان أقابل أخته، وأخته فى القعدة لا كانت بتبصلى ولا بتوجهلى كلمة، وانا استرجلت وما اتضايقتش، وهو لما قعد مع أعمامى وسألوه شوية أسئلة عادية جدا مع الأسف ماعملش زى واتقمص

واحد لما طلبت منه انه يقابل ابى الروحى طلع عينى علشان يوافق ... أكيد فيه عنده مشكلة، هو أصلا كان انسان مش سهل وأى حاجة عنده ليها 100 تفسير

نفس الشخص اللى عنده مدونة ده أنا قعدت على المدونة بتاعته أدرسها مش حبا فيه بس علشان أعرفه أكتر، وهو ولا قرا حاجة من اللى أنا كاتباها، والسبب انى كاتباعا بالانجليزى (باللغة الانجليزية زى ما قال لى) الفكرة انه بجد طززززززززززز فى المدونة بتاعتى ألف مرة بس ازاى هو ماكانش حتى عنده فضول انه يعرف أنا بفكر ازاى، وأما زنيت شويه فى موضوع البلوج ده طلع فى دماغة انى غيرانه منه ومتضايقه ان البلوج بتاعتى فقيرة ... روحت بلعن البلوج بتاعتى ووأنا قاعده معاه كنت هاشتم البلوجات على اللى عملوها، حاولت افهمه انى ليا حياتى ومستقبلى اللى الحمد لله مقتنعه بيها ولا فارق معايا البلوج دى بس ... يلا ... الانسان مابيشوفش غير اللى عايز يشوفه

واحد لما جه عندنا البيت وقعد مع أعمامى، انا وماما قدمنا الحاجة لوالدته الاول وبعدين اعمامى وبعدين هو، راحت والدته متصلة وازاى وازاى نقدمله هو اخر واحد وذكرت ان جوزها قال "كان المفروض ماتاخدش منهم حاجة، وتقوم من نص القعده" ... وهو الشخص ده قال لمامته "اظاهر ياماما ان شقتهم تمليك علشان كده كانوا قاعدين خايفين من أعمامها"

أنا بجد ياجماعة اتعرضت لضغط أعصاب كتير، والمشكلة، وبجد ده غلط انى مش ببين احتجاجى. كمان زى ما دكتور أحمد خالد بيقول ان روح الانسان بتاثر على شكله الخارجى، فالانسان السوداوى والمعقد بجد بيظهر على شكله. أنا شفت بنى ادمين كتير ماكانش فارق معايا شكلهم، بس كنت بتضايق من روحهم، كنت بحس ان روحهم لو ليها شكل فيبقى شكلها وحش

ياجماعة المواقف اللى فوق دى مجرد جزء بسيط جدا من اللى حصل